Actualités

Partagé sur :
• facebook

Notokanana tamin’ny fomba ofisialy omaly talata 11 janoary ny “studio” famokarana raki-kira sy raki-tsary etsy amin’ny Tranon’ny RNM (ny 25%-n’ny toerana ao) hoentin’ny orinasa House Of Madagascar tarihan’i Tiana Andria manampy ny mpanakanto malagasy amin’ny fampivoarana ny tsangan’asan’izy ireo hisedra ny tsena iraisam-pirenena.

“Sarotra ny ady amin’ny piraty raha mbola izao fahefa-mividin’ny Malagasy ambany dia ambany izao no mbola hividianana ny “originales”. Izany indrindra”, hoy ity tale ity, “no hanampiana ireo mpanakanto ireo mba ahafahana miatrika izany fifaninana any ivelany izany”. “Matoky izahay ny amin’izany”, hoy izy “fa manana ireo mpiara-miombon’antoka maro any ivelany raha tsy hiresaka afa tsy any Chine, Hong-kong, Dubai, Autralie, Indonezia sy Amerika fotsiny isika”. Tsy hanavahana gadon-kira sy mpihira ny famokarana ao amin’ity toerana ity ary hampiasain’ny Televiziona Malagasy amin’ny fakana feo sy sary ihany koa izy io sy ny fitaovana rehetra ao aminy izay an’ny HOM avokoa (Efa tetikasan’ny TVM tany aloha tany ity tanterahana ity, hoy ny fanamarihana). Nosokafana ofisialy tamin’io omaly io ihany koa ny “cantine” iray lehibe ao amin’ity toerana nohajarian’ny House Of Madagasikara ity ihany ka nandaniany vola an-tapitrisany maromaro ity. Mba tsy handanian’ny mpanakanto fotoana be loatra hivezivezy no tena antony araka ny fanazavan’ireo tompon’andraikitra telo mianadahy napetraky ny orinasa hitantana azy (Rakotoarivelo sy Kalo Ginette ary i Danny) nefa dia azon’ny besinimaro hidirana ihany koa ao fa ahitana ny sakafo tena malagasy (ny mpiasan’ny RNM sy TVM aza moa dia voalaza fa hahazo fihenam-bidy amin’ny fidirana ao). Ny zoma takariva dia fantatra fa hisy irony “cabaret after work” malaza ankehitriny irony hatao ao.

Tia Tanindrazana

Samia mijoro ho an'i Gasikara.