Actualités

Sisin-dranomasina Atsimo Andrefana Aripaky ny Sinoa ny hazan-dranomasina

Actualités
Zoma 25 Mey 2018

Sahiran-tsaina ary velon-taraina ireo mpanjono madinika any amin’ny Faritra Atsimo Andrefan’ny nosy,

araka ny tatitra nentin’ireo solontenany tonga manatevina ny tolona etsy amin’ny 13 mey Antananarivo fa misy sambo miisa 6 manjono ny hazan-drano anatin’ny ranomasina manomboka any amin’ny distrikan’i Morombe mandalo an’i Toliara faha-II sy Toliara I ka hatrany Ampanihy Andrefana any amin’iny Faritra iny. Tena manao ny danin’ny kibony ara-bakiteny sy manao izay tiany atao ireo Sinoa mampiasa an’ireo sambo 6 ireo. Asa angamba efa voavidin-dry zareo iny fari-dranomasina iny fa tsy mifidy trondro hazaina ny sambon’izy ireo na kely na lehibe fa alainy daholo. Voaelingelina ny mpanjono Malagasy mpiray tanindrazana sahirana amin’ny fitadiavana famelomana vady aman-janaka satria lasan’ny dahalo ny omby, lasan’ny Sinoa ny tany ambolena, ny ranomasina sy ny trondro ao aminy. Inona sisa no hiveloman’ireo mpanjono madinika ? Inona no hiveloman’ny mpamboly sy mpiompy ? Ny vahoaka Malagasy any Atsimo Andrefana dia mitaky ny fialan-dRajao sy ny forongony mpivarotra tanindrazana amin’ny Sinoa ary manao tantely afa-drakotra ny harem-pirenena amin’ny fanaovana kolikoly avo lenta. Manantena ny hetsika tarihan’ny depioten’ny fanovana miisa 73 ny mpanjono any amin’ny Faritra Atsimo Andrefana ary manohana ny vahoaka Malagasy amin’ny alalan’ny vavaka fa tena sahirana amin’ny fivelomana. MIALA RAJAO SY NY FORONGONY mpivarotra tanindrazana.

Ntsoavina Evariste