Actualités

Samy mpiasam-panjakana Be ireo mitaraina ho tsy mahazo karama

Actualités
Alakamisy 30 Desambra 2010

Manao ranolava hatramin’ny fiandohan’ity herinandro ity ny fitarainana ny tsy mbola naharaisana karama re tao amin’ny RNM, na tamin’ny fandaharana Ampitapitao na amin’ny fotoanan’ny fampahalalam-baovao. Mpiasam-panjakana any amin’ny distrika any no tena velon-taraina, ary saika mpiasa miankina amin’ny ministeran’ny atitany, ministeran’ny serasera ary ny ministeran’ny fiompiana ireto mitaraina ho tsy mbola nandray valin-kasasarany volana novambra ireto. Tratr’izany ny tany Manja (Menabe) ary nilaza ho tsy mba afaka nanao krismasy toy ny hafa.

Tsy fisiam-bola tao amin’ny “Perception” no olana tany. Nanampy trotraka indray ny fahasimban’ny fiaran’ny Distrika tokony hakana volana any Morondava. Omaly dia mitaraina mafy koa ny mpiasam-panjakana any Ampanihy Andrefana. Mbola resaka karama tsy voaray ihany koa ny azy ireo. Manginy fotsiny ny an’ireo mpampianatra FRAM, izay misy efa-bolana ny an’ny sasany tsy mbola eny an-tanana. Mipetraka ihany ny fanotaniana eo anatrehan’ny toe-javatra toy izany hoe, resaka fomba fiasa, sa fanadinoana, sa misy manodina ny volan’izy ireny ?

Jean D.