Actualités

Raharaha fakana an-keriny Pasitera iray nampidirina am-ponja

Actualités
Alatsinainy 13 Desambra 2010

Ny sabotsy 04 desambra teo no nampidirina am-ponja ny pasitera iray sy ny vadiny. Voalaza fa nikasa ny haka an-keriny zaza roa teny Ankadindramamy izy mivady ireto. Tamin’ny alalan’ny laharana finday nandefasan’ireo olon-dratsy “sms” no fantatra fa nitanana ilay mpitandrina. Rehefa nojerena tany amin’ireo mpandraharaha mantsy ilay laharana dia tsy voasoratra ny tompony saingy ireo olona roa nifandray taminy kosa no fantatra. Ireo olona ireo no nanonona ilay pasitera. Rehefa nanontanina izy dia nilaza fa novidiany ho an’ny vadiny ilay laharana. Milaza ho tsy mahalala io laharana io mihitsy anefa ny vadiny.

Raha tsiahivina dia nandefa “sms” milaza fitakiana vola tany amin’ny ray aman-drenin’ireo zaza kasaina halaina an-keriny ireo olon-dratsy. Raha tsy te ho faty ny zanakareo, hoy ilay “sms” dia omeo vola 15 tapitrisa ariary izahay. Natahotra ireo fianakaviana ka nanao fitoriana avy hatrany teny amin’ny zandary Betongolo. Ny sabotsy teo no natolotra ny Fitsarana ity raharaha ity ary naiditra am-ponja ilay pasitera sy ny vadiny.