Actualités

Raharaha BANI Mety tsy ho eto an-drenivohitra ny Fitsarana

Actualités
Alakamisy 20 Janoary 2011

Nanova zavatra betsaka teo amin’ny tantaran’ny Fitsarana sy ny voafonja ary ny mpitondra FAT ny fanambarana nataon’ny lietna-kolonely Andrianasoviana Charles, fotoana vitsy lasa izay teny amin’ny Fitsarana. Fepetra maro mantsy no noraisin’ny fandraharahana ny fonja sy ny ministeran’ny Fitsarana mba tsy hitenenan’ity manamboninhitra ity intsony, toy ny famindrana efitra azy teny Tsiafahy. Nisy ny sazy azon’ireo mpiandry fonja nitondra azy teny amin’ny tribonaly ka voalaza fa namela azy hiresaka tamin’ny mpanao gazety. Tsy avela miakatra aty an-drenivohitra intsony avokoa ireo manamboninahitra voarohirohy tamin’iny resaka BANI iny fa ny zokiolon’ny mpitsara mpanao famotorana no mankeny Tsiafahy manao ny famotorana azy ireo. Amin’izao fotoana izao dia efa misy hevitra sahady any ho any amin’ny tsy hanaovana ny fotoam-pitsarana ity raharaha BANI ity eto an-drenivohitra. Ny antony dia manahy ny hanaovan’ireo manamboninahitra ampamoaka indray ny FAT. Mba tsy hisian’izany dia eo am-piketrehana ny toerana hanaovana ity fotoam-pitsarana manan-daza ity ny eo anivon’ny FAT.

Rakoto Maxime