Actualités

Partagé sur :
• facebook

Mila ho isaky ny elakela-trano eto Antananarivo no ahitana oniversite tsy miankina amin’izao fotoana izao.

Maro amin’izy ireny no tsy ara-dalàna saingy afaka nisokatra ihany noho ny fahitana lalana amban’ny tany toy ny fanaovana kolikoly. Tsy misy rahateo ny vaomiera mazava manara-maso ka manjaka ny gaboraraka. Misy firaisana tsikombakomba amin’ny tompon’andraikitra ny fisokafan’ireny oniversite ireny raha halalinina ny zava-misy. Tranga fahita ihany koa ny fanitaran’ny oniversite tsy miankina sasany ny sampam-piofanana misy ao aminy raha toa ka sampam-piofanana iray no nahazoany fankatoavana ara-panjakana, toe-javatra izay nohamafisin’i Dr Johary Andrianambinina, Tale jeneralin’ny CNTEMAD. Maro ny voka-dratsin’izao toe-javatra izao toy fahasimban’ny lentan’ny fampianarana. Ny tena olana dia fahaverezam-bola sy fotoana ho an’ny tanora kanefa ny mari-pahaizana ho azo tsy hisy lanjany noho izy tsy hahazo fankatoavana ara-panjakana. Ilaina ny misoroka amin’ny alalan’ny fanaovana fanadihadiana mialoha ka anisan’ny zava-dehibe ny fanatonana ny eny anivon’ny minisiteran’ny asa sy ny lalàna sosialy manamarina raha toa ka voasoratra sy eken’ny fanjakana ny mari-pahaizana avoakan’ny oniversite tsy miankina iray. Tokony handray fepetra henjana ihany koa ny minisiteran’ny fampianarana ambony satria tsy ny oniversitem-panjakana ihany no iadidiany.

                                                                                                       Toky R.

Tia Tanindrazana

Samia mijoro ho an'i Gasikara.