Actualités

Olan’ny QMM any Tolagnaro Atahorana hivadika zavatra hafa

Actualités
Sabotsy 30 Jona 2018

Mbola nitohy omaly zoma teo ny grevy narahina filaharana tao Tolagnaro renivohitry ny faritra Anosy ka nizara roa ireo mpanao fihetsiketsehana.

Ny voalohany ireo nanao sakan-dalana tao amin'ny « 4 chemins Bezavona » lalana mizotra mankany amin’ny toeram-piasan’ny QMM Mandena.Nisy ireo olona 4 voasambotra mantsy ny alakamisy hariva ka naneho ny tsy fahafaliany noho izany ireo mpomba azy ireo.Tonga tany amin’ny tribonaly hangataka ny famoahana azy ireo ny mpiara-dia aminy.Raha tsy manaiky an'izany ny ao amin'ny fitsarana dia niara-nirohotra hanolon-tena higadra toy ny namany 4 ireo ry zareo.Fihetsika anisan'ny nahafaingana ny fitsarana izany.Tapaka fa ny alakamisy izao no hotanterahina io fitsarana io.Ny filaharana faharoa kosa dia nataon’ireo mpiara-miasa sy mpiara-miombon’antoka amin’ny QMM efa ho an-jatony mahery .Nitondra sora-baventy mitaky ny hanesorana ny sakana.Tsy nisy ny fifandonana na dia nafampana ihany aza ny zava-nisy ,nifampitazana fotsiny ny roa tonta.Atahorana hivadika zavatra hafa ity raharaha ity raha tsy misy ny fandraisana andraikitra haingana.Tsikaritra ihany mantsy fa misy ny mpanao mijapy ity toe-javatra ity.

Onesime Michel