Actualités

Mpilatsaka an-tsitrapo FJKM sy BNGRC Miara-miasa hiady amin’ny tondra-drano

Actualités
Zoma 03 Aogositra 2018

Nisy ny fiofanana ho fiomanana sahady ny fiatrehana ny taom-pahavaratra sy ny rivodoza notanterahana teny amin’ny kaominina Ambanivohitra Ampanefy,

faritra Analamanga, distrikan’Atsimondrano omaly alakamisy 2 aogositra. Fiaraha-miasan’ny mpilatsaka an-tsitrapo na volontera SAF FJKM avy amin’ny faritra rehetra sy ny birao nasionalin’ny fitantanana ny loza ara-boajanahary (BNGRC). Fanazarana andrana mihitsy no natao ary niarahana tamin’ny mponina tao Ampanefy. Marefo amin’ny resaka tondra-drano sy ny rivodoza ity kaominina ity ka izay no nifidianana azy. Anisan’ny voa mafy izy tamin’ny ranobe tamin’ny 2015 sy tamin’ny ora-nikija tamin’ny fiandohan’ny volana 2018. Fokontany 5 tamin’ny 8 tao Ampanefy no lasibatra tamin’izany ary nahatratra 4000 ireo traboina. Noho izany dia teraka ny fifanarahana famatsiam-bola avy amin’ny vondrona eoropeanina vao nosoniavina tamin’ny alatsinainy teo. 360 tapitrisa Ariary izy io ary hiompana tanteraka amin’ny fotodrafitrasa hiarovana amin’ny loza ateraky ny tondra-drano araka ny tatitry ny ben’ny tanànan’ny Kaominina Ampanefy, Atoa Ramiliarison Fabrice Lova Tiana. Etsy an-daniny, ny synodam-paritany 12 izay misy mpilatsaka an-tsitrapo miisa 10.000 mihitsy no miara-misalahy amin’izao hetsika izao mba ho tsara fiomanana amin’ny izay ranobe ho avy araka ny tatitry ny mpandrindra ankapoben’ny volontera FJKM, Ranaivoniarivo Ieja.

Tsiry