Actualités

Mpiasan’ny orinasa Fanalamanga Manohana ny tolona saingy manohitra ny fanakatonana ny orinasa

Actualités
Alakamisy 24 Mey 2018

Nivoaka tamin’ny fahanginany omaly ireo mpiasan’ny orinasa Fanalamanga maro isan-tsokajiny manoloana ny zava-misy ankehitriny.

Nambaran’izy ireo fa manohana feno ny tolona ho amin’ny fanovana izy ireo saingy tsy manaiky kosa ny fanapotehana sy ny fanakatonana ny orinasa Malagasy efa mandroso sy mamelona olona an’aliny tahaka ireny. Anisany ireo mpitrandraka ala, ny mpitatitra, ireo mpanao fanatanjahantena, ny mpanao arina … izay saika efa mamelom-bady aman-janaka avokoa. Ankoatra izay, nanampy ny rehetra ny orinasa Fanalamanaga sy ny tale jeneraly izay mitantana amin’izao fotoana sady nitsinjo ny mpiasa ihany koa. Io tale jeneraly io ihany koa no nanarina ny orinasa izay tao anatin’ny fahasimbana tanteraka. Manahy mafy ny mety hiverenan’ny fahapotehana indray izy ireo raha olona hafa no hitantana ity orinasa misy azy ireo ity. Nomarihin’ireto mpiasan’ny orinasa Fanalamanga avy any Moramanga ireto moa fa izay orinasa tsy mandroso no tokony hojerena ny fanovana izay mpitantana ao aminy fa tsy ireo efa mandroso sy manasoa vahoaka an’aliny maro.