Actualités

Partagé sur :
• facebook

An-dalam-pivahana ny olan’ny oniversite. Nahita marimaritra iraisana ny fitondram-panjakana sy ny Seces nandritra ny fifampidinihana in-droa miantaona ny sabotsy sy alatsinainy lasa teo.

Hiverina hiasa ny mpampianatra mpikaroka raha vao voaray ny tambinkarama momba ny fikarohana izay tsy fantatra marina ny maribola nifanarahan’ny roa tonta. Raha ny fanazavan-dRasoamiaramanana Armand, filohan’ny Direction Collégiale Seces dia tsy ilay 800.000 ariary araka izay voarakitra tamin’ireo didim-panjakana telo no azo fa latsak’izany. Notazoniny ho tsiambaratelo kosa anefa ny tarehimarika. Fa ankoatra io tambinkarama io dia handray tambinkarama iray hafa antsoina hoe : “indemnité de risque” koa ny mpampianatra mpikaroka. Mandeha miandalana anefa ny fahazoana ity farany.

Efa nankatoavin’ny filankevitry ny governemanta omaly avokoa ireo fifanekena rehetra ireo ka hevitry ny filankevitry ny ministra izay tokony hotanterahana amin’ity anio ity sisa andrasana dia hivalona hatreo ity resaka ity. Fa fepetra fahatelo notakian’ny Seces tamin’ny ministry ny fampianarana ambony sy ny ekipany nandritra ny fifampidinihana koa ny fahazoana antoka ny fandoavana ara-potoana ny vatsimpianaran’ny mpianatra sy ny karaman’ny mpandraharaha ary ny fisian’ny vola fampihodinana ny oniversite enina. Havadika didim-pitondrana avokoa izay fifanarahana tinapaka rehetra ary hajoro ny komity teknika hanara-maso ny fampiharana azy izay hisy ny solontena avy amin’ny andaniny sy ny ankilany. Azo antenaina izany fa tsy hisy ny taona fotsy eny amin’ny anjerimanontolo amin’ity taom-pianarana ity. Hamoaka avy hatrany ny fandaharam-potoan’ny famitana ny fanadinana fifindran-kilasy sy ny fandraisana mpianatra vaovao ny mpampianatra. 

Tia Tanindrazana

Samia mijoro ho an'i Gasikara.