Actualités

Misaona indray ny asa fanaovan-gazety Malagasy Nodimandry omaly i Christophe Haja

Actualités
Alakamisy 20 Septambra 2018

Misaona indray ny tontolon’ny asa fanaovan-gazety eto amintsika. Namoy ny ainy omaly maraina teny amin’ny hôpitaly HJRA Ampefiloha teo amin’ny faha-44 taonany ny namana Rasolonomenjanahary Christophe Haja,

mpanao gazety diso fantatra loatra teo amin’ny feony izay nanakoako tao amin’ny onjam-peon’ny Radio Tana. Vokatry ny aretina izay efa nikiky azy hatramin’ny ela ka nidirany hôpitaly nandritra ny roa andro monja no anisan’ny antony nitarika ny fahafatesany, raha araka ny fantatra. Tamin’ny taona 1995 no efa niditra teo amin’ny sehatry ny asa fanaovan-gazety izy raha tsiahivina kely ary tao amin’ny Radio Antsiva no nanombohany izany asa izany. Tamin’ny taona 2008 kosa no nifindrany tao amin’ny Rta. Ankoatra ny fananany traikefa manokana momba ny vaovao ara-panatanjahantena sy fitantatarana mivantana ny lalao baolina kitra dia maro be ihany koa ireo karazana fandaharana efa novokariny sy nahafantarana. Ankoatra izany dia mpanao gazety eo anivon’ny ORTM ihany koa ny vady andefimandrin’i Christophe Haja ary izy kosa dia mpikambana feno ao amin’ny AJSM “Association des Journalistes Sportifs Malagasy”. Eny an-tokantranony eny Ankadindramamy no handrasana ny nofo mangatsiakany. Namela mananon-tena sy kamboty mirahalahy i Christophe Haja. Mirary fiononana feno ho an’ny fianakaviana manontolo izahay eto amin’ny gazety Tia Tanindrazana.

Pati/Evariste