Actualités

Minisiteran’ny serasera Misavorovoro

Actualités
Alarobia 12 Septambra 2018

Tokony ho notanterahina omaly ny fifamindram-pahefana teo amin’ny talen’ny kabinetra teo aloha, eo anivon’ny minisiteran’ny serasera sy ny fifandraisana amin’ny andrimpanjakana etsy Nanisana, Dr Dieudonné Rakotoaridina sy ny vaovao

Miary Rasolofoarijaona fa tsy raikitra. Tsy nety niroso tamin’izany itsy voalohany, izay notendren’ny minisitra Rahajason Harry Laurent fantatry ny maro amin’ny solon’anarana hoe : Rolly Mercia. Tsy nambara mazava ny antony. Ny minisitra am-perinasa Riana Andriamandavy VII kosa no nanendry an’i Miary Rasolofoarijaona, ity farany izay mpanao gazety eo anivon’ny Radio Nasionaly Malagasy (RNM), ary talem-paritry ny serasera faritra Analamanga. Sekretera jeneralin’ny Holafitry ny mpanao gazety eto Madagasikara ihany koa izy. Hatramin’ny nanendrena ny minisitra Riana Andriamandavy VII dia mila ho isan’andro no andrenesam-baovao manamaloka ity tontolon’ny serasera ity. Nisy andiana mpanao gazety nilanja sorabaventy manohitra azy nandritra ny famindram-pahefana nifanaovany sy ny minisitra Rahajason Harry Laurent nodimbiasany toerana. Nisy indray, in-telo miantoana izay, ny fikasan’ny minisitra hanolo ireo tale eo anivon’ny ofisin’ny radio sy televiziona malagasy (ORTM) sy tale eo anivon’ny minisitera, fa savorovoro no niafarany ary mety taratr’izany ity famindram-pahefana tsy tanteraka omaly ity. Tonga hatrany amin’ny fitakiana ny fialan’ny minisitra ity mihitsy aza ny resaka amin’izao.

Jean D.