Actualités

Hetsika faran`ny herinandro

Actualités
Zoma 25 Mey 2018

Manan-danja eran`izao tontolo izao efa hatramin`ny ela ny fankalazana ny fetin`ny reny ka rariny loatra raha mitobaka ny hetsika etsy sy eroa

Zoma 25 mey
Mode, beauté et bien-être:

Nanomboka omaly etsy amin’ny Village Voara Andohatapenaka ny andiany voalohany ary tsy hifarana raha tsy sabotsy 26 mey. Hetsika ara-barotra ahitana sehatra isan-karazany izy io, indrindra ireo kojakoja sy lamaody azo atao fanomezana ho an`ny rehetra amin`ny alahady ho avy izao. Anisan’izany ny filatroana sy fampisehoana maro karazana ankoatra ireo tranoheva samihafa misokatra ho an’ny mpitsidika tsirairay. Ho hitantsika eny amin`ny Box 35 ny Jejoo izay hanoro torohevitra eo amin`ny resaka amin`ny fikarakarana endrika amam-bika.

La grande braderie de Madagascar

Mbola mitohy hatrany ny hetsika natokana ho an`ny reny izay tsy hifarana raha tsy amin`ny alahady ho avy izao ary hahitana tranoheva maherin`ny 280 isa ka anisan`ny tena misongadina sy betsaka indrindra ny kojakoja ho an`ny vehivavy amin`izao fankalazana ny fetin`ny reny izao. Tsy latsa-danja amin`izany ireo karazana kojakojan-dakozia maro samihafa. Vonona hatrany ireo tranoheva rehetra hanome fahafaham-po ny mpanjifa na dia misy amin`ireo mpandray anjara hatramin`izay aza no tsy afaka mandray anjara noho ireo entany mihitsoka ao amin`ny seranan-tsambon`i Toamasina.

Romantic Night

Feo sy endrika vaovao andrasan`ny maro etsy amin’ny Hotel Tamboho Tana Water Front i Miangaly Narimanana, anio manomboka amin’ny fito ora sy sasany hariva. Tsy ho diso fanantenana, araka izany, ireo mpankafy ny sangan’asan’ity mpanakanto vao misongadina ity izay mivoy ny « classique », indrindra ireo mpiangaly gitara. Marihana fa efa ny taona 2014 no nivoaka ny rakikirany voalohany izay mitondra ny lohateny hoe « Ara Dia Alma »

Sabotsy 26 mey

Tamaga Best Swag

Ao amin’ny Night Club Pattaya Toamasina no hifamotoana ny mpankafy an`i One Lio. Ho vahiny manokana i Ghalli, Giresse, SQWAMBA City Gang. Hanomboka amin’ny roa ora sy sasany ny fotoana.

Mozika malagasy sy amerikanina

Hahazo tombony manokana ireo mpankafy mozika klasika sy ireo maniry hahay an`ity karazan-kira ity. Miompana indrindra amin`ny mozika klasika ny Fihaonana “ara-mozika” etsy amin`ny CCI Ivato manomboka amin`ny 3ora sy sasany tolakandro. Haneho ny talentany ny Jejy Mozika ary ho vahiny manokana i Bekoto ao amin`ny tarika Mahaleo.

Alahady 27 mey

Fetin`ny Maman`ty

Samy hiezaka hanome izay kanto indrindra ireo mpanao hatsikana hilahatra ao amin`ny hetsika “Fetin`ny Maman`ty” etsy Coliseum Atsonjombe. Horefesina amin’ny kakakaka ny ao anatin’ny kianja amin`io andro io ny hatsikana hataon’i Francis Turbo, Fou Hehy, Gothlieb, Barhone… Mazava loatra fa hitana ny tsiky sy tokelaky ny mpijery hatramin’ny farany izy ireo.