Actualités

Partagé sur :
• facebook

Mirongatra indray ny vaky trano amin’ny alina ao amin’ny fokontany Ambohimena. Saika isak’alina dia hitrangan’izany raha ny fanamafisan’ny lehiben’ny fokontany. Ny alin’ny zoma 13 febroary 2015 lasa teo dia tokantrano iray no saika hotafihan’ny mpamaky trano niisa 3 lahy. Efa nihainohaino ny mponina io alina io satria ny alin’ny alakamisy dia nisy lakozia iray novakian’ny

jiolahy ka bisikileta sy vilany no nalain’izy ireo. Taitra ny mponina ary nifanejehana ireo jiolahy fa tsy tratra. Ny zoma io dia nandrasan’ny mponina fotsiny ho tafiditra tao amin’ilay trano nokendreny ireo jiolahy dia raikitra ny antsoantso ary nifanenjehana ireo jiolahy niisa 3. Tafaporitsaka ny roalahy, lehilahy iray tokony ho 50 taona no tratran’ny fokonolona ka nanamparan’izy ireo ny fony. Vokany, naratra mafy ilay lehilahy ary tsy nahatsiaro tena. Nantsoina ny kartie mobily ary ireo no niantso ny polisy tao Ambohimena. Nentina haingana teny amin’ny hopitaly ilay mpangalatra saingy tsy tonga tany dia tapitra ny ainy. Raha ny fanazavana nomen’ny lehiben’ny fokontany dia efa tena leo tanteraka ny vahoaka no mahatonga ny fitsaram-bahoaka satria tsy mandry andro aman’alina ny mponina kanefa ny fiainana efa mafy. Voalaza fa tsy mponina teo amin’ny fokontany fa avy any Mandaniresaka ilay lehilahy matin’ny fitsaram-bahoaka. Efa eo am-pelatanan’ny mpitandro ny filaminana ny raharaha.

 Caïus R

Tia Tanindrazana

Samia mijoro ho an'i Gasikara.