Actualités

Fihinanana vatomamy misy poizina Zaza iray no maty teny Alakamisy Fenoarivo

Actualités
Talata 14 Desambra 2010

Zazalahy kely iray efa-taona, zanak’olona sahirana ara-pivelomana monina ao amin’ny Fokontany Ambohimasina, Kaominina Alakamisy Fenoarivo no namoy ny ainy teo no ho eo ny alahady 12 desambra lasa teo raha vantany vao avy nihinana ilay vatomamy marika “yoghurt”, nomena vehivavy roa tsara tarehy azy. Dimy lahy ireto ankizy ireto no niaraka saingy voasakan’ilay efa lehibebe mahara-baovao ny telo ka avotra soa aman-tsara. Fanina niankarapoka kosa ny iray ary voatery nentina teny amin’ny hopitaly HJRA Anosy izay marihina fa zokin’ity namoy ny ainy ity ihany.

Niditra elakela-trano ireto vehivavy roa tsara tarehy ireto araka ny fijoroana vavolombelona nataon’ilay zazalahy kely iray efa mahara-baovao. Notambatambazany izy dimy lahy kely ary samy nomeny ilay vatomamy. Nisy tamin’izy ireo anefa no nanda saingy mbola notereny ihany. Anisan’izany ity namoy ny ainy ity, dimy ambiny folo minitra taorian’ny nahalaniany ilay vatomamy. Lavavolo be ilay vehivavy iray ary somary mandoko volo kely raha “coupe carrée” kosa ny iray izay samy mibaby kitapo avokoa. Tokony ho tamin’ny iray ora folakandro tany ho any no nitrangan’izany. Marihina fa ireo karazan’olona sahirana tsy manana radio na televiziona hahazoam-baovao no tena kendren’ireto mpizara vatomamy misy poizina ireto. Andrana amin’ny herin’ny poizina hampiasaina no tena tanjona tian’izy ireo ho kinendry araka ny fahitan’ny rehetra azy izay tsy mbola fantatra aloha hatreto ny mety ho tohiny. Marihina fa tsy ny vehivavy irery ihany no manao ity asa fizarana vatomamy misy poizina ity fa misy lehilahy ihany koa izay marihina fa samy mitondra 4X4 avokoa. Rahampitso alarobia 15 desambra no halevina ny razana raha efa nivoaka ny hopitaly omaly kosa ilay zokiny.

Niantomboka teto an-drenivohitra, tetsy Amparibe, ity resaka fizarana vatomamy misy poizina ity, roa herinandro lasa izay. Niitatra tany Tsiroanomandidy izay nitarika fidiran’ny ankizy miisa 15 hopitaly tao amin’ny EPP Ankadinakanga. Izao indray dia niverina tao Fenoarivo ireo olon-dratsy ary nahafaty olona tamin’ity endrika famosaviana ity. Efa nisy iray tamin’ireo «mpamosavy» no voatazon’ny pôlisy ao Tsiroanomandidy tamin’ny herinandro teo ary inoana fa hahitàn’ny mpanao fanadihadiana làlana izany mba hahafantarana ireo olon-dratsy sy izay mety ho ao ambadik’ity asa ratsy ity.

r.d sy Pati