Actualités

Fiaraha-miasa Hanohy ny fanampiany ny Amerikanina

Actualités
Zoma 13 Jolay 2018

Tonga nitsidika tamin’ny fomba fifanajana an’ny praiminisitra, Ntsay Christian, ny tale jeneraly misolo toerana eo anivon’ny USAID, Chris Milligan, niaraka tamin’ny Mpiandraiki-draharahan’ny Masoivoho Amerikanina, miasa sy monina eto Madagasikara, Stuart Wilson omaly.

Nambarany fa nanararaotra ny fotoana omaly ny tenany hiresahana ny fanatsarana ny fiaraha-miasa efa nisy hatrizay, sy nijery ihany koa ny hanitarana izany amin’ny sehatra hafa ary nampahafantarana ireo zava-bitan’ny governemanta amerikanina, nentiny nanasoavana ny vahoaka Malagasy tamin’ny alalan’ny USAID. Nanambara i Suart Wilson fa manomana lamin’asa hanampiana ny firenena Malagasy ny Amerikanina amin’izao fotoana izao. Marihina fa tetikasa fampandrosoana miisa fito eny anivon’ireo ministera no vatsian’ny USAID, momba ny fahasalamana, ny fambolena sy ny fanjariantsakafo, ny tontolo iainana, ny fiatrehana ireo loza voajanahary, ny fiaraha-miasa amin’ny sehatra tsy miankina, ny fanohanana amin’ny resaka fifidianana ary ny fampianarana. Fotoana ihany koa niarahabany ny praiminisitra noho ny nanendrena azy hitantana ny governemanta Malagasy, omaly.

Marigny A.