Actualités

Partagé sur :
• facebook

Ny TCR (Tanora Contre Ravalomanana) no nampidirin’ny Kaominina an-tsehatra handroaka ireo fako miavosa eran’ny tanàna ao Mahajanga.

Mitokona tsy miasa efa herinandro anio izao ny mpiasan’ny Kaominina, mitaky ny karamany izay efa mananika ny efa-bolana amin’ity desambra ity izao no tsy voaloa. Asa be no miandry ireto TCR ireto amin’ny fanalana ny fako efa niangona herinandro. Mety ho izay angamba no mitarika ny fametahana takelakazo, toy ny hita ao Mangarivotra nanomboka omaly hariva, milaza fa mandoa 10.000Ar  izay tratra manary fako eo amin’ny toerana fanarian’ny olona fako ao. Mahagaga ny mponina amin’ny fokontany Mangarivotra sy Mahajanga be ihany ny fahitana izany, raha avy amin’ny TCR no niavian’io fandrarana io, satria miditra amin’ny zavatra tsy tokony hidirany izy ireo. Raharahan’ny Kaominina no manapaka izany, ary tokony hahazo fankatoavana avy eo anivon’ny Filankevitry ny tanàna vao ampiharina.

Amin’ireto mponina ireto dia fisalovanana tsotra izao ny asan’ny Kaominina izany. Tovolahy kely iray tsy nanampo na inona na inona izay tonga hanary fako toy ny mahazatra teo amin’io fanarian’ny mponina ao Mangarivotra fako io, no sendra azy ireo, ary saika voavely bolongan-kazo omaly tolakandro. Lasa nisy mpiambina tampotampoka koa ilay toerana, efa fanarian’ny mponina fako io. Araka ny fantatra dia mpiambina ny OTIV izy io, izay mbola fanontaniana mipetraka koa hoe tafiditra amin’ny asa sahaniny sy nampiandraiketina azy ve io fiambenana toeram-panariam-pako io sa asa ambony ampanga ? Ny zava-nisy omaly mantsy dia nasainy noraofina ny fakon’ilay tovolahy ary nentina nody. 

Tia Tanindrazana

Samia mijoro ho an'i Gasikara.