Actualités

Claudine Razaimamonjy Nafahana madiodio ?

Actualités
Alarobia 12 Septambra 2018

Niteraka resabe nanomboka omaly hariva ilay famotsorana an-dRamatoa Razaimamonjy Claudine, voarohirohy noho ny resaka kolikoly ka taorian’ny fanadihadiana nataon’ny Bianco no nisamborana azy.

Niatrika fanadihadiana lalina teny amin’ny fitsarana manokana momba ny kolikoly izy ary avy eo nampidirina am-ponja vonjimaika. Ny 03 aprily 2017 ity mpandraharaha sady mpanolotsaina manokan’ny filoha teo aloha Hery Rajaonarimampianina ity no nosamborina teny Mahamasina. Voalaza omaly fa nafahana madiodio i Claudine Razaimamonjy, izany hoe tsy migadra intsony satria tsy ampy ny porofo itazonana azy any am-ponja. Marihina fa tsy mbola niakatra fitsarana ny raharaha Claudine, ary mbola maro ny vavolombelona tokony hohenoina ary misy ny manampahefana ambony teo aloha. Anisan’ny naneho hevitra tamin’ny pejy facebook omaly avy hatrany Rtoa Fanirisoa Ernaivo, mpitsara, efa filohan’ny SMM ary kandida filoham-pirenena. Tsy mazava ity raharaha ity, hoy izy satria mbola misy dosie maromaro itazonana an’i Claudine Razaimamonjy sy ny namany. “Fa oviana moa ny fitsarana namoahana didy fa afaka madiodio izy ?”, hoy hatrany Rtoa Fanirisoa Ernaivo. Anisan’ny niteraka resabe teto amin’ny firenena ny raharaha Claudine A&C ary azo antoka fa tsy maintsy mbola hiteraka resabe indray manomboka izao.

RTT