Actualités

Building Ramaroson Toeram-pivarotana 20 may kila

Actualités
Talata 22 Mey 2018

Nirehitra ny toeram-pivarotana sinoa miisa 20 etsy amin’ny Building Ramaroson etsy Soarano tao ambany rihana sy ny rihana voalohany ny alahady antoandro teo.

Mbola amin’ny andro mampifanaretsaka ny olona mpivarotra sy mpiantsena etsy Behoririka no niredareda tampoka ny afo izay tsy nijanona intsony raha tsy adim-pamantaranandro maro taty aoriana na dia nanao ny ainy tsy ho zavatra aza ny mpamonjy voina. Hatreto dia heverina ho “court-circuit” no nitarika ny loza, raha araka ny fanazavana azo teny an-toerana. Lehibe ny fatiantoka satria kila avokoa na ny entana na ny toeram-pivarotana. Nisy ampahany may ihany koa ny tsenan'i Pochard. Ao anatin’ny fotoana mampavaivay ny politika isika amin’izao fotoana, ka maro no mety hampifandray amin’izany amin’ny toe-draharaham-pirenena. Vao misy rahateo ny savorovoro politika, dia efa ny raharaha 2009 no mitamberina ao an-tsain’ny mpandraharaha eto amintsika. Olana amin’ireo toeram-pivarotana na fotodrafitrasa lehibe sasany eto amintsika ihany koa anefa ny resaka fiomanana amin’ny loza, toy ny tsy fisian’ireny “bouche d’incendie” ireny, ka mampanano sarotra ny famonjena voina.

Toky R