Politique

Partagé sur :
• facebook

Nitsangana tao Toamasina ny sabotsy 19 desambra teo ny "Vovonana ho amin'ny

Fizakan-tenan'ny Faritra sy ny Fanorenana ifotony an'i Madagasikara na "Plateforme pour l'Autonomie des Régions et la Refondation de la République de Madagascar”, taorian'ny famelabelarana ny tanjona kendren'izany Vovonana izany izay nataon'Atoa Zafivao Jean Louis, Filoha nasionalin'ny Antoko politika Gasy Mifankatia (GASY MI) sy Andriamatoa Joel Harisson Marie René, Filoha nasionalin'ny "Faribolana mandinika ny ho avin'i Madagasikara" na CRAM (Cercle de Réflexion pour l'Avenir de Madagascar). Aorian'ny fitetezana ireo Faritra miisa 22 mba ho fampahafantarana ny antony vao hatsangana ara-panjakana ny Birao_nasionaly. Maro no voalaza fa antony nananganana io vovonana io. Noho ny tatitra nataon'ny tompon'andraikitra eran-tany momba ny tontolo iainana WWF fa: "Ny toekaren'i Madagasikara no mitana ny laharana voalohany eran-tany amin'ny fahapotehan'ny tontolo iainana amin'ny taona 2050" ka nanapan-kevitra ny Antoko politika GASY MI sy ny Faribolana mandinika ny ho avin'i Madagasikara fa handray anjara amin'ny fanazavana ny loza mitatao eto amin'ny Firenena sy ampatsiahy ny fitondram-panjakana fa ny fametrahana ny Fizakan-tena ara-bola sy ara-pitantanana isam-paritra ihany no vaha olana amin'izao fahantrana lalim-paka mahazo ny firenena izao. Araka ny lalàna fehizoro 2014-018, andininy faha-16 dia milaza fa: Ny fitsinjaram-pahefana eo amin'ny Fanjakana sy ireo vondrom-bahoakam-paritra itsinjaram-pahefana dia tsy maintsy mifantoka amin'ny tombontsoam-pirenena sy ny tombontsoa eny ifotony. Mangataka amin'ny fanjakana hanatanteraka ny fametrahana ny rafitra Fizakan-tena ara-bola sy ara-pitantanana eto Madagasikara ity vovonana ity, mba afahan'ireo olom-boafidy sy ny vondrom-bahoaka itsinjaram-pahefana manatanteraka ny vina fampandrosoana ny Faritra izay iadidiany mba afahan'izy ireo mamaha ny olana ara-tsosialy sy manatanteraka ny fotodrafitrasa ilain'ny vahoaka, ary miaro ny tontolo iainana ho an'ny taranaka fara aman-dimby.

Toky R

Tia Tanindrazana

Samia mijoro ho an'i Gasikara.