Politique

Partagé sur :
• facebook

Nanao fanambarana tamin’ny mpanao gazety ny faran’ny herinandro lasa teo, ny fikambanana Vondron’olon-tsotra (VOT) Alaotra Mangoro.

 Tamin’izany no nanehoan’izy ireo ny fijeriny mahakasika ny toe-draharaham-pirenena ankehitriny. Tokana ihany hoy izy ireo ny vahaolana amin’izao krizy eto amin’ny firenena izao dia ny fodian-dRavalo sy ny filatsahany hofidiana. Tsy hisy mihitsy izany fitoniana izany raha tsy mody ny filoha Marc Ravalomanana araka ny fijerin’ireo VOT any amin’iny Faritra Alaotra Mangoro iny. Hitohy hatrany ny fijaliana mahazo ny vahoaka Malagasy raha mbola mitarazoka ny fampiharana ny tondrozotra dia ny andininy rehetra tsy misy hanalana na hanampiana, hoy izy ireo. Fehin-kevitra hitovizan’ny VOT manerana ny Faritra Alaotra Mangoro, hoy izy ireo ny fampodiana ny filoha Marc Ravalomanana an-tanindrazana sy ny fitakiana ny firotsahany amin’ny fifidianana filoham-pirenena.

Niditra nivantana tamin’io fotoana io ny filoha nasionaly ny Vondron’olon-tsotra Rtoa Sarah Zoé ka tamin’izany no nilazany fa tsy baikon’ny mpanao politika izahay ary tsy misy manery anay mihitsy, fa fitiavan-tanindrazana no hitolomanay, aza mety ho fitahin’ny mpanao politika ianareo, mody omeny seza dia variana. Tokana ny antsika ny tanjona, hoy izy dia ny fodian-dRavalo sy ny filatsahany hofidiana. Adidiko sy adidinao ny fanavotana ny firenena izay lalaovin’ireo mpanongam-panjakana. Tsy adinon-dRtoa filoha ny VOT manerana ny Nosy ny nampahery ireo vahoaka traboina any Anororo izay tany niaviany ary dia nilaza izy fa ho avy ny fotoana hitondrany izay voatsirambin’ny tanana hanampiana ireo traboina any an-toerana.

Niry A.

Tia Tanindrazana

Samia mijoro ho an'i Gasikara.