Politique

TTM Ambatondrazaka Fanamby ny famerenana ny filoha Marc Ravalomanana

Politique
Alarobia 15 Desambra 2010

Nandritra ny fankalazana ny tsingerintaona faha-61 nahaterahan’ny filoha Marc Ravalomanana, ny 12 desambra, no nilazan’ireo mpiara-mitolona eo anivon’ny fikambanana Tia Tanindrazana Mandresy (TTM) fa ny tanjona tsy mbola miova dia ny famerenana ny filoha Marc Ravalomanana eto Madagasikara. Ireo rehetra nandaha-teny tamin’ny alahady lasa teo dia samy nametraka ny fanantenana ny amin’ny hahatongavan’ny filoha Marc Ravalomanana tsy ho ela. Tao anatin’ny hafaliana tanteraka no nentin’ireto mpomba ny filoha teo aloha ireto niseho vahoaka indray rehefa somary nangingina nandritra ny fotoana naharitra. Betsaka no tsy nino fa havory olona indray ny mpanohitra ao Ambatondrazaka. Na teo aza ny fanakiviana nataon’ny olona sasany, tsy nihemotra ireo nahatsapa ny zavatsoa vitan’ny filoha Ravalomanana fa niezaka nanao izay hanatanteraka ilay fankalazana ny tsingerintaona nahaterahany. Niditra an-telefaonina nampahery ireo mpiara-mitolona ny solontena ny GTT any Marseille. Fizarana mofo mamy no nentin’izy ireo namarana ny fotoana tamin’ny alahady teo io.

Niry R.

Sary : Hetsiky ny Tia Tanindrazana Mandresy Ambatondrazaka ny alahady 12 desambra 2010