Politique

Sefo fokontany nesorina Ho tendrena atsy ho atsy ireo mpisolo toerana

Politique
Alatsinainy 10 Aogositra 2020

Maro ny fitarainana tonga teny amin` ireo ambaratongam-pahefana isa-tsokajiny momba ny tsy fahatomombanana ny fitsinjarana ireo fanampiana avy amin` ny fitondram-panjakana.

Voatondro molotra tsy mahavita ny asany, araka izany, ireo sefo fokontany. Taorian` ny fidinana ifotony nataon` ireo sampandraharaham-panjakana isan-tsokajiny dia nahitana tsy fahatomombanan-draharaha sy tsy fandraisana andraikitra avy amin` ireo sefo fokontany. Torak` izany ihany koa ny kolikoly, kitranoantrano ary fanavakavahana. Lesoka mampibaribary ny tsy fahaizana mitantana eny anivon` ireo fokontany tokoa ireo. Raha ny tatitra avy amin` ny prefen` Antananarivo dia ny zoma lasa teo ihany dia efa maro ireo sefo fokontany nesorina tamin` ny toerany. Tsy mbola voafaritra aloha ny isan` ireo sefo fokontany nesorina hatreto saingy ahiana hitombo isa hatrany izany aoriana ny fanadihadiana samihafa. Raha ny fanazavana nataon` ny minisitry ny atitany sy ny fitsinjaram-pahefana dia aorian` ny krizy ara-pahasalamana vao mety hisy ny fifidianana sefo fokontany. Noho izany, mety ho tendrena avy hatrany ireo mpisolo toerana satria tery ny fotoana. Marigny A.