Politique

Manarina ny fahabangana tamin’ny tsy nahateo azy nandritra ny fotoam-pivoriana faharoan’ny Parlemantan’ny tetezamita, fa tavela tany Toamasina, amin’ny fikarakarana ny fanondranana lodsia ny tenany, Roland Ratsiraka rahateo manana orinasa miasa eo amin’io lalampihariana io, dia izao manao izay hisarihana maso sy saina amina fihetsiketsehana toy itony mba tsy ho difotra any. Izay rahateo ny politika gasy, mila miseho dia miteniteny eny, na tsy misy lojika mazava aza, fa mba hanamarihana ny fisiana fotsiny ihany sao hadinon’ny olona. Efa nialohavana valandresaka tamin’ny mpanao gazety teto an-drenivohitra raha ny an’i Roland Ratsiraka ny herinandro lasa iny, izay niantsoany an’i Andry Rajoelina hilatsaka hofidiana ho filoham-pirenena amin’ny fifidianana ho avy eo. Fa amin’ny lafiny iray dia navesatra tamin’ireo mpanao politika sy antoko politika miara-dia amin’ny FAT, ka anisan’izany ny MTS, ny resaka nandeha fa i Tantely Andrianarivo no ho ilay praiministry ny marimaritra iraisana, hotendren’i Andry Rajoelina eo. Azo heverina fa izay no anton’itony hetsika any amin’ny Faritra itony, entina hilazana fa manana olona ary manana ny tanjany ny ny MTS, ka tsy azo tsinontsinoavina. Diso paika ihany anefa ireo mpanao politika sy antoko nihevitra izany, satria dia fantatra izao fa tsy hamadika izay efa nifanarahany tamin’ireo filoha efa nitondra ity Madagasikara ity sy ny Malagasy ny amiraly Ratsiraka sy ny ankolafy misy tarihiny ary tsy ho Praiministr’i Andry Rajoelina izany i Tantely Andrianarivo.

 

Jean D.

 

Sary : Roland Ratsiraka, filoha nasionalin’ny antoko MTS