Politique

Partagé sur :
• facebook

“Manoloana ny fiampangana sy fitazonana an’Andriamatoa Mahery Lanto Manandafy noho ny fanehoan-kevitra tsotra nataony tao amin’ny Facebook dia iaraha-mahita fa misy tokoa ny fanamparam-pahefana ary fanitsakitsahina ny lalampanorenana ataon’ny mpitondra.

Voalaza mazava ao amin’ny andininy faha-folon’ny lalampanorenana anefa fa iantohana ny fahalalahana maneho hevitra”, hoy ny fanambarana nosoniavin’i Marc Ravalomanana Filohan’ny Rodobenn’ny Mpanohitra eto Madagasikara na ny RMDM omaly. Nambarany fa ny fiampangana sy ny fitazonana azy izay nataon’ny mpitandro ny filaminana dia azo adika tsotra izao fa fanaovana ramatahora an’ireo Malagasy rehetra sahy maneho ny heviny ankahalalahana sy mitsikera ny tsy fahombiazan’ny mpitondra. Arak’izany dia efa mihatra eto amin’ny firenena ny didy jadona sy ny fanapotehana ny demokrasia, hoy io fanambarana io. Tsy azo ekena intsony ny fanaovana ramatahora, ny didy jadona, ary ny fanitsakitsahina tsy misy farany ny lalàmpanorenana ataon’ny mpitondra fanjakana iarovana ny tombontsoa politikan’izy ireo. Noho izany dia manameloka tanteraka izao fiampangana sy fitazonana an’Andriamatoa Mahery Lanto Manandafy izao izahay. Takianay ny hamotsorana azy haingana ary tsy misy fepetra. Melohinay ihany koa ny fampiasana ny mpitandron’ny filaminana sy ny fitsarana ho fitaovana politika sy herim-pamoretan’ny mpitondra, hoy ny fanambarana nosoniavin’i Marc, izay marihina fa ny marainan’ny omaly no nanaovana azy, izany hoe talohan’ny didim-pitsarana an’i Mahery Lanto Manandafy.
Toky R 

Tia Tanindrazana

Samia mijoro ho an'i Gasikara.