Politique

Partagé sur :
• facebook

Tsy mivaona amin’ny foto-kevitra ijoroany amin’ny maha ao anatin’ny ankolafy Zafy Albert azy ny vondrona politika HPM (Hery Politika Mitambatra) ary mahita fa tsy maintsy atsangana ny Komitim-pirenena momba ny fampihavanan na CNR, araka ny nambaran’i Ralison Roger, mpikambana CST no sady HPM.

Hisy ny soso-kevitra amin’ny fanatanterahana izany haroson’ny Hery Politika mitambatra eny anivon’ny Parlemanta, dia ny CST sy ny CT izany, raha ny nambaran’ity filohan’ny antoko PRM ity ihany. Ho azy ireo mantsy dia manana nandraikitra goavana sy mankadiry amin’ny fandaminana ny fiarahamonina sy ny firenena ity CNR ity, satria tsy maintsy miroso amin’ny fifamelana sy ny fampihavanana ny rehetra eto Madagasikara, izay vao afaka tena hiroso amin’ny asa fanarenana sy fampandrosoana ny firenena. «Tsy maintsy tanterahana eto ilay ‘grand pardon national’, ka ny CNR no hiandraikitra sy hikarakara izany, ka tokony handray anjara mavitrika amin’io avokoa ny herivelona rehetra eto amin’ny firenena. Raha ahitana olana ihany koa ny fananganana ireo rafitra ahitana ny fiaraha-mitantana dia aleo ny CNR no handamina izany ary hamoaka ny soso-kevitra isan-karazany handrafetana ny marimaritra iraisana eken’ny maro an’isa», hoy i Ralison Roger nanohy ny fanazavany. Tsy mora anefa izany asa rehetra izany fa tena mitaky fikirizana ny fifanomezan-tanana, satria mety ao anatin’ny efa-taona no hanatanterahana ny fampihavanam-pirenena, hoy izy araka ny fandinihan’ny ankolafy Zafy Albert azy, izay efa hatramin’ny taona 2002 no nitaky ny hisian’ny fampihavanam-pirenena ; ka tena tsara sy mety, hoy i Ralison Roger raha dieny izao dia atsangana haingana io Komitim-pirenena momba ny fampihavanana io fa tsy iandrasana ny fahalanian’ny filoha vaovao hitantana ny Repoblika faha-IV satria mila fitoninana isika.

Tia Tanindrazana

Samia mijoro ho an'i Gasikara.