Politique

Ralaiseheno Guy Maxime Alentika fa atahorana

Politique
Zoma 26 Novambra 2010

Nomelohan�ny fitsarana tamin�ny fiampangana azy ny Ben�ny tan�nan�Ankaraobato sady filohan�ny Fikambanan�ny Ben�ny tan�na manerana ny nosy (AMM), Ralaiseheno Guy Maxime.

Sazy mihatra roa volana an-tranomaizina no didy navoakan’ny mpitsara taorian’ny fotoam-pitsarana izay naharitra adiny iray teo ho eo, omaly alakamisy 25 novambra 2010. Nolavina kosa ny fangatahana fahafahana vonjimaika nangatahan’ny mpisolovava miaro azy. Famoriam-bahoaka tsy nahazoana alalana teny Analakely ny sabotsy 20 novambra 2010 sy fanohizana ny fihetsiketsehana na dia efa naparitaky ny mpitandro ny filaminana tamin’ny alalan’ny fandefasana etona mandatsa-dranomaso no vesatra iampangana azy. Nanazava Ralaiseheno Guy Maxime tamin’ny fiarovan-tenany fa zo voafaritry ny lalàmpanorenana ao amin’ny andininy faha-10 ny fahafaha-maneho hevitra imasom-bahoaka. Ankoatra izay dia tsy mbola tontosa akory, hoy izy ny famoriam-bahoaka izay antony anenjehana azy dia ny fisamborana no nandeha aloha.

Momba ny fiampangana faharoa indray dia nambarany fa tsy voahaja ny lalàna satria tsy nisy akory ny teny nataon’ny mpitandro ny filaminana teny an-toerana ireo Ben’ny tanàna nisalotra samboady handao ny toerana nisy azy fa daroka baomba avy hatrany no nahazo azy ireo izay narahan’ny fisamborana. Nezahana nanontaniana moa ny hevitry ny mpiaro ny Ben’ny tanànan’Ankaraobato raha hampakatra amin’ny fitsarana ambony izy saingy tsy nanome ny heviny ity farany. Ireo Ben’ny tanàna mpikambana ao amin’ny biraon’ny AMM izay niatrika ny fotoam-pitsarana teny Anosy dia nanambara fa tsy foana akory fa vao mainka hatanjaka ny fikambanana na eo aza izao zava-misy manjo ny filohany izao. Noraisin’izy ireo fandresena koa ny fanemorana ny datim-pifidianana Ben’ny tanàna. “Tsy nihemotra io daty io raha tsy nihetsika izahay. Aoka koa anefa tsy hohadinoin’ny fanjakana fa izahay Ben’ny tanàna ihany no rafitra ara-dalàna eto”, hoy i Eugène Grégoire, filoha lefitry ny Fikambanana Ben’ny tanàna, Faritra Atsimo Atsinanana.

Tanjona politika

Tody amin’ny tanjona iriany ny FAT amin’izao fanamelohana an-dRalaiseheno Guy Maxime izao satria raha tsy misy ny fampakarana ny raharaha ataon’ny mpiaro azy dia azo antoka fa any am-ponja ny tenany no hankalaza ny fetin’ny Krismasy sy faran’ny taona. Haloto ihany koa anefa ny mombamomba azy izay tsy ahafahany milatsaka hofidiana intsony ary izay indrindra no tanjona amin’izao raharaha izao. Anisan’ireo Ben’ny tanàna nanahirana ny fanjakana na teo aloha, indrindra fa ny ankehitriny Ralaiseheno noho izy nahatafavory Ben’ny tanàna 500 teto Iarivo na dia nisy aza ny fandrahonana isan-karazany avy amin’ny mpitondra isam-paritra. Tamin’ny fitondrana teo aloha indray dia naharesy ny kandida natolotry ny TIM ny tenany tamin’ny fifidianana Ben’ny tanàna na dia nandray anjara tamin’ny fanohanana ny mpifanandrina aminy aza ny praiministra.

Sary : Ralaiseheno Guy Maxime nandritra ny fitondrana azy teny amin’ny fitsarana