Politique

Partagé sur :
• facebook

«Ny manampahefana manome baiko no tompon’andraikitra eo amin’izay zava-mitranga”, araka ny fitsipi-pifehezan’ny foloalindahy.

Raha ampiharina tamin’ny zava-nitranga teny amin’iny raharaha BANI nitranga ny volana novambra 2010 io fehezanteny io, araka ny fanazavana, dia tsy afaka miala andraikitra amin’iny ny lehiben’ny etamazaoro jeneralin’ny tafika malagasy na ny Cemgam ka nahavoa ireo manamboninahitra mpikambana teo anivon’ny Komity Miaramila ho Fanavotam-pirenena na ny KMF. Araka ny fikaroham-baovao natao dia nisy ny ‘Engagement’ na fanenkena an-tsoratra nataon’ny Cemgam ny zoma 19 novambara 2010, ary nahazo izany ny KMF. Taratasy izay milaza sy manamafy fa tsy hisy fampiasana hery ary atao amin’ny alalan’ny fifampidinihana ny zavatra rehetra.

Na teo aza moa ny taratasy dia ny loharanom-baovao hafa milaza fa narahina antso an-tariby izany ho fanamafisana, kinanjo moa tsy izay no niseho fa tsy voafehy ireo miaramila avy amin’ny FIS sy ny «Garde présidentielle», izay mazava loatra fa miandany tsy misy fepetra amin’ireo mpitondra eo anivon’ny FAT. Mazava efa fa tsy voahaja ny teny izay voasoratra, baraingo koa ny fanapahan-kevitra noraisin’ny Cemgam teo anatrehan’izany. Tsy mahagaga raha tonga hatrany amin’ireo hevitra tapaka nandritra ny “assises militaries” ny resaka ankehitriny, indrindra momba ny fandefasana miaramila any am-ponja. Efa ho iray volana mahery moa izao no eny am-ponja ireo mpikambana eo anivon’ny KMF. Samy miandry ny fivoaran’ity raharaha ity ny rehetra, satria mety ho loza mitatao ho an’ny firenena sy ny taranaka ny fiandaniana sy fitanilana amin’ny FAT ataon’ny mpitandro ny filaminana sy ny foloalindahy ary ny fitsarana, izay lasa miharihary loatra amin’izao fotoana.

Tia Tanindrazana

Samia mijoro ho an'i Gasikara.