Politique

Pr Radanoara Julien “Misy firenen-dehibe ao ambadiky ny fanonganam-panjakana…”

Politique
Alakamisy 20 Aogositra 2020

Nisy fanonganam-panjakana niseho tany Mali izay nanasamborana an` ny filoham-pirenena Ibrahim Boubacar Keita (IBK) sy ny praiminsitra ary ny mpikambana eo anivon` ny governemanta any an-toerana ny talata lasa teo.

Mitranga amin` ny firenena maro ny fanonganam-panjakana ary mety hiitatra izany amin` izao fotoana izao rehefa very ny tombotsoan` ny firenena lehibe iray, hoy ny Pr Radanoara Julien, mpampianatra fifandraisana iraisam-pirenena. “Matoa misy ny fanonganam-panjakana aty Afrika dia misy firenena lehibe iray ao ambadika. Rehefa tsy mahatana ny tombon-tsoany ilay fitondrana ao an-toerana dia ataony izay mahaleo azy eo. Iaraha mahalala fa misy firenena iray manana “base militaire” any Mali, any Centre-Afrique.” Matetika ny tafika no manao izany fanonganam-panjakana izany satria hita hatrany fa rehefa manome fanampiana ireo firenen-dehibe ireo dia ny tafika no misitraka izany. Fomba iray ihany koa hahafahany mambabo ny tafika dia ny fanolorana marim-pankasirahana ho an` ireo manamboninahitra afrikanina. “Ny Legion d`honneur dia mari-boninahitra ambony. Na ianao mpiaro ny tombontsoa frantsay na olona atokisany rehefa misy ilàny azy. Ny fanonganam-panjakana dia ny miaramila no manohana izany ary ankavitsiana ny hoe ny vahoaka no manongana aty Afrika”, hoy hatrany ny Pr Radanoara Julien.

Marigny A.