Politique

Partagé sur :
• facebook

Hivory etsy amin’ny hotely kintana telo, Ibis Ankorondrano, ireo Comité Directeur Arema miaraka amin’ny Direction Collégiale Arema, manomboka rahampitso alarobia 05 janoary.

Ireo lohandohany isan’ny mpanorina ny Arema mihitsy ireto hivory ireto, raha ny filazan-dRazanakoto Norbert, iray amin’ireo handray anjara amin’io fivoriana io. Anisan’ny ho avy ao ry Vaovao Benjamin mbamin-dry Pierrot Rajaonarivelo, ity farany izay sekretera nasionalin’ny Arema, nametra-pialana avy eo naverin’ny mpikambana amin’ny toerany taorian’ny fivoriana tao amin’ny Espace Mon Goûter Andrefan'Ambohijanahary ny volana desambra 2009. Araka ny fantatra dia lasa tampoka any Toamasina any izy ny alahady teo noho ny raharaham-pianakaviana ; nanamafy anefa i Razanakoto Norbert fa hoavy hanatrika sy handray anjara amin’io fivoriana io izy. Ny avy eo anivon’ny MDM (Mientana ho an’ny Demokrasia eto Madagasikara) indray anefa nilaza fa raharaha manokan’ny Arema io eny amin’ny Ibis io ka tsy misy idiran’ny filoha mpitarika ny MDM.

Ho an’ny mpandinika politika kosa dia manao tan-droa i “Tonton Sôla”, fy aminy ny Arema nefa mamy koa ny MDM. Paikady politika avokoa io, izy sy ny fikambanany rahateo mihevitra ny hisedra safidim-bahoaka amin’ireo fifidianana isan’ambaratongany eny hatrany amin’ny fifidianana filoham-pirenena koa aza. I Pierrot Rajaonarivelo rahateo manamafy hatrany fa ny fifidianana irery ihany no lalana azo antoka hiverenana amin’ny ara-dalàna. Nampandany ny Tsia tamin’ny fitsapan-kevi-bahoaka natao ny 17 novambra 2010 farany teo izy ireo ary nilaza fa nahafa-po ny vokatra na dia kely aza ny noenti-manana. Efa ampy izay ny krizy sy ny fangirifiriana, hoy i Pierrot Rajaonarivelo ka tokony ho hita amin’izay ny vahaolana hampitsaharana ny krizy. Araka ny fantatra ihany koa dia mazoto ny hiditra ao amin’ny rafitry ny tetezamita iaraha-mitantana izy.

Tia Tanindrazana

Samia mijoro ho an'i Gasikara.