Politique

Paul Rabary “Tsy hiverina ho minisitra izany aho”

Politique
Alakamisy 21 Janoary 2021

Efa nahavita adidy teto amin’ny firenena aho ka tsy hiverina ho mpikamban’ny governemanta izany,

hoy ny minisitry ny fanabeazam-pirenena teo aloha, Paul Rabary, manoloana ny feo mandeha fa mieritreritra ny hiverina amin’izany izy. Aleo anjaran’ny hafa indray. Manoka-tena amin’ny maha mpiasam-panjakana amin’ny fampianarana ireo solofo handimby ny ala isika amin’izao fotoana izao fa tsy amin’ny fitantanana raharaham-panjakana intsony. Misy harena eto Madagasikara ary porofo mivaingana iny raharaha volamena farany teo iny. Ny zava-dehibe indrindra raha te hampandroso firenena dia ny fahaizana mifehy ny harentsika. Tsy hiditra amin’ny raharaham-pitsarana aho. Fomba fijery hafa no hitondrako azy hoe raha hiatrika fampandrosoana, fiakaran’ny vidin’entana, fanaovana fotodrafitrasa, fiezahana hampandroso ny lafiny sosialy, ny resaka hopitaly, fampianarana, kolontsaina dia mila enti-manana. Efa niangaran’Andriamanitra amin’ireo harena tsy hita pesipesenina eto Madagasikara isika fa ny olana dia tsy voafehintsika ilay izy. Ny fifehezan’ny fanjakana sy ny banky foibe ny harem-pirenena no tena laharam-pahamehana eto, raha iny zava-niseho iny. Tsy ny resaka 74 kilao no olana fa ny aman-taoniny aman-taoniny. Izay no mila fehezina fa rehefa voafehintsika izay dia afaka manao ny tetikasa rehetra isika, hoy hatrany izy.

J. Mirija