Politique

Paikady Enti-manandratra an'i Madagasikara Hanome 240 tapitrisa euros ny Frantsay

Politique
Zoma 21 Febroary 2020

Nambaran’Atoa Jean-Yves Le Drian, minisitry ny raharaham-bahiny Frantsay omaly nanoloana ny mpanao gazety fa mitohy ny fifampidinihana ny amin’ny famerenana ny « Iles Eparses » ho an’ny Malagasy.

Mitaky ady hevitra lalina izany ary ho tanterahina ao anatin'ny fifampatokisana, sy ny firahalahiana ary ny mangarahara hatrany, hoy izy.Tsy mbola misy kosa aloha hatreto ny fehin-kevitra tapaka na marnaritra iraisan amomba ireo nosy ireo.Fa tetsy ankilan’izay dia fifanaraham-piaraha-miasa roa eo amin’ny La Frantsa sy Madagasikara no natao sonia omaly teny amin’ny Lapam-panjakana Iavoloha. Nambara ihany koa fa hanome 240 Tapitrisa Euros ny Governemanta frantsay ho fanohanana ny Paikady Enti-manandratra an'i Madagasikara (PEM). Ny antsasak'izany fanampiana izany dia fanomezana maimaim-poana, ary ny antsasany kosa dia hampindramina, ary ho raisin'ny Agence Française de Développement (AFD) an-tanana ny fanafainganana azy.Niompana tamin’ny sosialy indrindra fa ny fanabeazana ny resaka nifanaovana tamin’ny delegasiona notarihin’ny Minisitry ny Raharaham-bahiny frantsay .Ny fifanaraham-piarahamiasa voalohany natao sonia dia mikasika ny fanampiana ara-bola mitentina 14,3 Tapitrisa Euros ho fanohanana ny Teti-pivoarana ho an'ny fanabeazana (PSE). Ny fifanaraham-piarahamiasa faharoa natao sonia kosa dia mikasika ny fifanarahana lasitra momba ny fiarahamiasa eo amin'ny sehatry ny fanabeazana hatrany, mandritra ny telo taona, eo amin'ny Minisitera roa tonta.

RTT