Politique

Minisitry ny vola Namaly an-kolaka ny orinasa AAA

Politique
Alarobia 09 Septambra 2020

“Izay tsy manara-dalàna, dia tsy maintsy manara-dalàna aloha. Tsy ianao tsy manara-dalàna indray no hanome lesona ny fanjakana. Rehefa tsy manara-dalàna ianao dia aorianao ny fanjakana.

Rehefa tsy mandoa hetra ianao, dia aorianao ny fanjakana” , io no valin-tenin’ny Minisitry ny toekarena sy ny vola Atoa Richard Andriamandranto tany Toliara taorian’ny fifampiresahany tamin’ireo mpandraharaha, toy ny mpisehatra amin’ny harena an-dranomasina tany Toliara ny fiandohan’ny herinandro teo. Nisy rahateo ny atrik’asam-paritra hoenti-mamolavola ny tetibolam-panjakana 2021. Fifandrifian-javatra ve sa valin-kafatra an-kolaka toa ny orinasa AAA no tena iantefany fampidiran-dresaka fotsiny ny momba ireo mpandraharaha any Atsimo? Io orinasa io rahateo amin’izao fotoana izao no tena ananan’ny Fanjakana olana, ary nakatony noho ny resaka ara-ketra, araka ny fanazavana hoentin’ny mpitondra manome rariny ny fanapahan-kevitra noraisiny. Tsara ampahatsiahivina anefa, fa 12% raha be indrindra ny tahan’ny fandoavan-ketra eto Madagasikara ka asa na orinasa iray tokoa no tsy mandoa hetra eto raha izay tokoa ilay olana na ny 90%.

Toky R