Politique

Partagé sur :
• facebook

Anisan’ireo rafitra najoro tao anatin’ny fitondrana Fahefana Avon’ny Tetezamita ary hita any anatin’ireo karazana fifanarahana politika natao tany ivelany (Maputo) sy teto an-toerana ny Vaomiera mahaleotena momba ny fifidianana na CENI.

Raha ny endriny amin’izao fotoana aloha dia tsy mbola ahitana taratra ny hoe fiaraha-mitantana mihitsy ny CENI, ary raha nandalo teto amintsika nandritra ny herinandro ny iraka manokana avy amin’ny SADC notarihan’Atoa Leonardo Simao dia nanambara fa tokony hokitihana ny firafitry ny CT sy ny CST ny governemanta ary ny CENI. Koa manoloana izany dia nilaza Atoa Hery Rakotomanana filohan’ity Vaomiera mahaleotena momba ny fifidianana ity fa tsy sanatria hidongy toerana izany mihitsy izy sy ny mpiara-miasa aminy, fa rehefa hifanarahan’ny besinimaro fa ovaina endrika ny CENI dia azo tanterahana tsara izany, raha toa ka izay no hahatsara zavatra. Tsy toeram-boninahitra hanangonan-karena akory no misy anay fa asa goavana sy makadiry ho an’ny firenena. Nisarika ny sain’ny rehetra kosa anefa izy ary nilaza fa ho voahaja ve ilay datin’ny 16 martsa hanatanterahana ny fifidianana solombavambahoaka raha toa ka hokitihana na ovaina endrika ny CENI, amin’ny volana janoary ohatra. Azo antoka mantsy, hoy i Hery Rakotomanana fa raha vao miova ny aty amin’ny foibe dia tsy maintsy hiova ihany koa ny firafitr’ireo masoivohon’ny CENI any amin’ny distrika, ka mety mila fotoana elaela ihany izany. Koa raha izany fanazavana izany no dinihana tsara dia tsy dia marisika firy amin’ny hikitihana indray ny endriky ny CENI amin’izao fotoana ny filohany, fa kosa tsy mandà ny fanatsarana tokony hatao, anisan’izany ny fidiran’ny mpanohitra ao amin’io rafitra io.

Tia Tanindrazana

Samia mijoro ho an'i Gasikara.