Politique

Marimaritra iraisana Be fanantenana i Simao

Politique
Alakamisy 13 Janoary 2011

Nigadona eto Madagasikara hatry ny omaly tolakandro ny Dr Leonardo Simao, hanohy indray ny asa fanelanelanana amin�ny famahana ny krizy, anirahan�ny SADC ny delegasiona tarihiny eto.

Be fanantenana ny tenany ny amin’ny hahitana marimaritra iraisana eo amin’ireo ankolafy midinika na tsy mbola nanome fandaharam-potoana na koa sori-dalana mikasika izany aza ny tenany. Aleo tsy miresaka betsaka aloha, fa eo isika mahita izy, hoy izy. Ny hany nambarany dia misokatra amin’ny rehetra ny fihaonana sy ny fandraisana tolokevitra. Milaza ny tsy mahalala no tsy te haneho hevitra momba ilay resabe nandeha teto mikasika ny fisian’ny tararasin’ny Firenena Mikambana, noriritin’ny mpomba ny FAT fa fankatoavana ny fitondran’ity farany, ny Dr Simao.

Tetsy ankilan’izay dia nihaona tamin’ny ankolafy Zafy teny Ivandry ny avy amin’ny CNOSC. Tsy nisy nipika ny fihaonan’ny roa tonta izay naharitra ora roa teo. Amin’ity anio ity, raha tsy misy ny fiovana, dia hitohy indray ny dinika eo amin’ny Tiako I Madagasikara sy ny TGV miaraka amin’ny UDR-C. Raha ny lojika dia tonga eo amin’ny fandrafetana ilay fifanarahana lasitra ifanaovan’ny roa tonta ny dingan’ny fihaonana ankehitriny. Tsiliantsofina no andrenesana fa fanirian’ny filoha teo aloha Marc Ravalomanana sady mpitarika ny Ankolafy Ravalomanana ny mba hatrehin’ny solontena iraisam-pirenena ny fanaovana izany ho vavolombelon’izay voasoratra sy ho fampanajana ny teny nomena sy nekena.

Jean D.

Sary : Dr Leonardo Simao teo am-pahatongavana teny Ivato omaly (sary : RADO)