Politique

Partagé sur :
• facebook

Mety hanara-dia ny amiraly Ratsiraka amin’ny fiverenana an-tanindrazana koa ve Atoa Marc Ravalomanana ? Efa drafitra mialoha nifampiresahana ve ny azy mirahalahy sa ahoana ? Inona no antony nampiparitaka ilay feo hoe : hampody azy eto Madagasikara ny fanjakana Afrikanina Tatsimo ?

Maro be ny fanontaniana tsy afaka am-bavan’ny maro tato ho ato izay mikasika ny mety ho fiverenan’i Dada. Araka ny vaovao miparitaka amin’ny tranokala sy efa navoakana gazety mpiseho isan’andro eto amintsika maromaro ihany ary efa niverimberina tamin’ny onjampeo dia ho avy eto Madagasikara amin’ny faran’ny volana febroary Atoa Marc Ravalomanana. Ankoatra ny hoe fihaonana amin’ny fianakaviana sy ireo mpanohana ary mpiara-mitolona, dia eritreretin’ireo mpanara-baovao momba ny fiainam-pirenena fa kajy politika ihany koa ity fiverenan-dRamose ity.

Voasoratra ao anatin’ny lalàmpanorenana mantsy fa tsy maintsy monina sy mipetraka eto Madagasikara, enim-bolana farafahakeliny mialoha ny daty hanatanterahana ny fifidianana izay ho kandida filoham-pirenena. Koa raha manam-paniriana ny ho kandida ity filoha teo aloha ity dia tsy maintsy mody eto Madagasikara ato anatin’ny iray volana, izany aza mety efa tara, raha toa ka tanterahana amin’ny volana mey na jona 2011 ny fifidianana filohan’ny repoblika. Lamaody ao anatin’izao tetezamita izao anefa moa ny fampihemorana daty koa mety tsy ho tara masinina ihany Atoa Ravalomanana. Inoana ihany koa fa tsy hipetra-potsiny ireo mpanohana sy mpiara-dia aminy fa hikaroka ny fomba rehetra hahafahany milatsaka, fa mialoha izay aloha dia tsy maintsy miverina an-tanindrazana i Dada. 

Tia Tanindrazana

Samia mijoro ho an'i Gasikara.