Politique

Partagé sur :
• facebook

«Tsy diso mihitsy ny fijerin’ny vehivavy MFM hatramin’izay», hoy Rtoa Malalatiana Rasoaniana mpitarika azy ireo, «fa nohamafisin’ny Kôlônely Charles Andrianasoavina izao fa tena fanonganam-panjakana no nisy teto amintsika tamin’ny taona 2009». «Mihamafy hatrany izany ny tsy hisian’ny fankatoavana ny tetezamitan’i Andry Rajoelina sy ireo fivoriana sy fikaonan-doha ary ny sarintsarina «conférence nationale» nataony rehetra ireny. Mbola tsy mitombina koa araka izany ny fitsapan-kevim-bahoaka natao farany teo ka mitaky hatrany ny fanafoanana azy iny izahay vehivavy MFM». «Tsy misy afa-tsy ny fandravana ny zava-misy rehetra nantsagana tao anatin’ny roa taona no mahavaha ny olana eto amintsika ankehitriny», hoy Rtoa Malalatiana, «dia mody an-tanindrazana Ravalomanana Marc sy Ratsiraka Didier izay vao manangana ny tetezamita tena izy isika mianakavy ho amin’ny demôkrasia marina dia ny GVTD araka ny filazan’ny MFM azy hatrizay». Nambarany mazava koa fa tsy manaiky velively ny hisian’ny fisokafana ataon-dRajoelina sy ny fanatevenan-daharana ny governemanta izay hatsangany ho avy eo ny vehivavy MFM. Karazany efa voafitaka ny vahoaka tamin’ny kabary fampidinana ny kilaon’ny vary ho manodidina ny 1100 Ar nefa ny fampanantenana natao fahiny dia ho 500 Ariary. «Efa miteny daholo izao ny mpanohana an-dRajoelina marobe teny amin’ny 13 mai», hoy ity mpitarika ny vehivavy MFM ity, «fa diso fanantenana ary mahatsapa fa izy Andry Rajoelina no tena fototry ny krizy misy eto Madagasikara ankehitriny».

Tia Tanindrazana

Samia mijoro ho an'i Gasikara.