Politique

Leader Fanilo Mitaky ny hamoahana ny tetiandro momba ny fifidianana

Politique
Zoma 17 Desambra 2010

Mitaky ny hamoahan’ny fitondram-panjakana ny didim-pitondrana mametra ny tetiandro hanatanterahana ny fifidianana rehetra, mialoha ny faran’ny taona ny antoko Leader Fanilo, araka ny tenin’ny filoha nasionaliny, Manasse Esoavelomandroso. Izany no atao dia mba hahafahan’ireo antoko vonona ny handray anjara amin’ny fifidianana miomana tsara sy manomana ireo mpikambana ao aminy manerana ny nosy. Ankehitriny mantsy, araka ny nambaran’ity filoha nasionalin’ny Leader Fanilo ity, dia manjavozavo ny toe-draharaha ary tsy hita izay hambara amin’ireo mpikambana ao anatin’ny antoko, ary tena manahirana ihany izany amin’ny fiomanana rehetra satria sao dia mamely am-pitaka tahaka ny fanaon’ny teo aloha ny fitondrana amin’izao fotoana, ka handeha ila indray izay fifidianana hitranga manaraka eo. Nambaran’i Manasse Esoavelomandroso fa nandray anjara foana tamin’ny karazam-pifidianana rehetra natao teto amin’ny firenena nanomboka tamin’ny 1992 ny Leader Fanilo ary mbola vonona ny hiatrika izay fifidianana rehetra ho avy eo, saingy mila atao mazava tsara ny fitsipi-dalao ary atao matotra ihany koa ny fanomanana mba ho tena mendrika ilay hoe fanovana nimatimatesana marina ny zava-mitranga. Ny fanontaniana mipetraka moa dia hoe misy mihaino ve zy ireo.

RTT