Politique

Kolontsain’ny famadihana palitao Maka faka amin’ny tanora manao politika

Politique
Alarobia 09 Desambra 2020

Nanao fanambarana tetsy amin’ny Le Pavé Antaninarenina omaly ry zareo eo

anivon’ny Hetsiky ny mpifidy vaventy avy eny ifotony, izay ahitana mpifidy vaventy avy amin’ny firehana samihafa, raha ny nambaran’izy ireo. Tsy nety nanonona ireo antoko na fikambanana politika hafa ankoatran’ireo nitondra ny loko volomboasary tamin’ny fifidianana moa izy ireo. Ny fandraisana anjara amin’ny fifidianana sy fanohanana ny kandida avy amin’ny IRD ihany, hoy izy ireo, no antoky ny fampandrosoam-pirenena. Mikasika ny mety ho fanalan’ireo antoko misy anay noho ny fanapahankevitray, hoy ny tanora olom-boafidy iray nisolo tena azy ireo, dia tsarovy fa ny eny ifotony no mitady olona ka raha izahay eny ifotony indray no alana dia tadidio fa be dia be ny mandray avy eo. Tsikaritra ho efa maka faka amin’ireo tanora manao politika aty aoriana koa araka izany ny kolontsain’ny famadihana palitao ary mampametra-panontaniana hoe mbola mety hanana ny hoaviny ve izany etika sy deontolojia amin’ny fanaovana politika eto Madagasikara izany atsy ho atsy ? Tena faharesen-dahatra madiodio tokoa ve no nanosika ireto olom-boafidy ireto ?

J. Mirija