Politique

Partagé sur :
• facebook

Ny sabotsy 20 novambra lasa teo no nisamboran’ny mpitandro ny filaminana ireo manamboninahitra nivondrona tao amin’ny Komity miaramila ho an’ny fanavotam-pirenena na ny CMSP, teny amin’ny BANI Ivato.

Hatramin’izao dia mbola miteraka resabe iny raharaha iny ary dia manao ranolava ny fanehoan-kevitra. Tamin'ity indray mitoraka ity dia ny lietna kolonely Charles Andrianasoavina izay mpitondra tenin’ny CMSP no naneho ny heviny an-taratasy. “Miely ny resaka hoe fandrika nentina hamandrihana mba hanamborana ny jeneraly Raoelina Jean Heriniaina no nidirako ho mpikambana mba hananganana ny Comite Militaire pour le Salut Public na ny CMSP. Laviko marindrano izany vaovao miely izany”, hoy ny lietnà kolonely Charles Andrianasoavina.

Araka ny fanazavany dia voafidy ho filoham-boninahitry ny Cercle de Réflexion Fitovinagny na ny CR7 hitarika ny fampihavanam-pirenena ny tenany. Ankoatra izay dia nambarany fa kitro ifaharan’ny fampihavanana ny foloalindahy ka zara aza, hoy izy, nahita sehatra hampisehoana izany fampihavanana izany dia ny CMSP. Teo am-pamaranana ilay taratasy dia nanambara ny lietna kolonely Charles fa “tena nifanarahanay rehetra ny hihavana sy hampihavana, ny foloalindahy mitarika ny hampihavanana ny Malagasy rehetra fa tsy sanatria nisy fandrika nataoko hahazoana ny jeneraly Raoelina Jean Heriniaina”, hoy ihany izy. Raha tsiahivina moa dia ny 17 novambra 2010 no nanao fanambarana tamin’ny haino aman-jery teto an-drenivohitra ny CMSP nilaza fa ravana ny FAT, ary dia ny foloalindahy no hitantana ny firenena ao anaty fotoana voafetra mandra-pahita izay sivily ifanarahan’ny rehetra fa hitondra. Fiokoana moa no nandikan’ny FAT izany ary dia nisy ny fanafihana ny BANI ny tolakandron’ny sabotsy 20 novambra 2010 na dia nifanarahan’ny rehetra aza fa hovahana amin’ny alalan’ny fifampiraharahana fa tsy hifampitifitra ny samy foloalindahy. Nanomboka teo dia nalefa teny Tsiafahy sy Antanimora avokoa ireo manamboninahitra 16 lahy voakasika mivantana tamin’iny raharaha BANI iny.

Tia Tanindrazana

Samia mijoro ho an'i Gasikara.