Politique

Kly Charles Tsy azo vangiana ao Tsiafahy

Politique
Alatsinainy 29 Novambra 2010

Niveri-maina ny havany tonga eto an-drenivohitra, raha nanantena ny mba hifanatri-tava amin’ny lietnà-kolonely Charles Andrianasoavina tao Tsiafahy raha namangy azy ireo tany izy ireo omaly alahady. Taratasy sisa ifanaovana ary ankarihary avokoa izany fa tsy azo afenimpenina. Araka ny fantatra dia voasokajy ho miaramila mampidi-doza ity manamboninahitra nafana fo tamin’ny fametrahana izao fitondran’ny Fahefana Avon’ny Tetezamita izao ity, saingy dia fonja sisa herintaona sy tapany aty aoriana no tambiny ho azy. Mazava fa dia tohina ihany ny fon’ny fianakaviany eo anatrehan’ny toe-draharaha. Toy izany koa ireo miaramila sasany iray andiany, faha-19, aminy tao amin’ny Akademia Antsirabe, ireo mpitandro ny filaminana iray fiaviana aminy avy amin’iny Vatovavy Fitovinany iny. Ankoatra ny lietnà-kolonely Charles Andrianasoavina dia tanana am-ponja vonjimaika ao Tsiafahy ihany koa ny jeneraly Rakotonandrasana Noël sy manamboninahitra enina hafa, voasambotra tao amin’ny BANI Ivato ny sabotsy 20 novambra 2010.

Jean D.