Politique

Kabarin’ny PM tao amin’ny ONU “Nampianay ireo orinasa, nahomby ny CVO…”

Politique
Alatsinainy 28 Septambra 2020

Ny sabotsy 26 septambra teo tokony ho tamin’ny 11ora alina tany ho any no niteny tao anatin’ny fivorian’ny Firenena Mikambana ny na ny ONU andiany faha-75 ny Praiminisitra Ntsay Christian.

Nibahan-toerana ny resaka valanaretina covid-19 ka nitondrany hafatra firaisankiana sy fankaherezana ho an’ny vahoaka maneran-tany. Toy ny firesaka isan-tapa-bolana, dia noresahina ny famokarana ny CVO izay fanefitra nenti-paharazana nohatsaraina, vokatry ny fikarohan’ny IMRA, sady fisorohana no fitsaboana mahomby, hoy ny Praiminisitra. Miavaka amin’ny harena voajanahary rahareto i Madagasikara. Natomboka ny fotodrafitra goavana, toy indostrian’ny fanafody amin’ny alalan’ny fananganana ozinina lehibe mpamokatra io CVO io. 93% ny taham-pahasitranana, 216 ny namoy ny ainy ary 1,2% ny taham-pahafatesana. Nanomboka volana martsa nidiran’ny Covid 19 dia nambara fa nametraka ny paikady marolafy ara-toekarena, sosialy, tontolo iainana,... Asa goavara nametrahana ny Ivon-toeram-pibaikoana nasionaly (CCO) sy isam-paritra (CRCO), nanao kaomandina arotava maherin’ny 5 tapitrisa tamin’ny orinasa tsy miankina sy ny afaka haba. Ara-tsosialy, nanampy ny mponina sahirana, nanampy ny sehatra tsy miankina tamin’ny lafiny ara-ketra, nanome masomboly sy fitaovana ho an’ny tantsaha,…

FANJAKANA TAN-DALANA SY DEMOKRASIA

Manenjika ny fahatarana amin’ny fandrosoana i Madagasikara ka isan’ny laharampahamahena ny fanamafisana ny ady amin’ny kolikoly indrindra fa amin’ny fitantanan-draharaham-panjakana, manome antoka amin’ny fahaiza-mitantanana, hamafisina ny fahamarinan’ny ny fitsarana,… Fanajana ny tany tan-dalàna sy ny fampiroboroana demokrasia. Asa raha izany tokoa no miseho eto ? Manomana ny fifidianana loholona amin’ny desambra 2020 noho ny fahataperan’ny fe-potoana amin’ny janoary 2021. Eo anilanay hatrany ny Fianakaviambe iraisam-pirenena amin’ny fanamby goavana ara-pampandrosoana entin’i Madagasikara, ka isaorana, hoy ny Praiminisitra. Nambara fa manana ny fanamby goavana “Global post-covid” I Madagasikara. Tsy nisy resaka kosa na kely aza ny raharaha “îles Eparses”.

Toky R