Politique

Partagé sur :
• facebook

Nanao fanambarana ny Komitin` ny Fahamarinana sy ny Fandriampahalemana ary Fiadanana (K3F) manoloana ny fiainam-pirenena.

Mahatsapa ny K3F fa tafiditra ao anaty fahantrana lalina ny Malagasy. Miha mahazo vahana sy mamono olona maro ny COVID-19 sy ny aretina hafa. Manampy trotraka ihany koa ny firongatry ny fahaverezan` asa sy ny tsy fandriampahalemana. Miharihary ny lesoka sy fahalemen` ny rafi-pitantana ny fanjakana. Tsy mifampatoky ny mpitondra sy ny vahoaka ka zary enta-mavesatra ny fepetra napetraky ny fanjakana hiadiana amin` ny valanaretina. Tsy ampy ny fandraisana andraikitra sy ny fahavononan` ny rehetra hampandroso marina ka fifanomezan-tsiny sy fanamarinan-tena no mahazo laka eo amin`ny sehatra rehetra. Miha lalina ny hantsana mampisaraka ny manan-katao sy ny ankamaroan` ny Malagasy. Mitady adinodino ny fiheverana ny ho avy sy ny fitsahana fampandrosoana marina eto amin` ny firenena. Miantso ny mpitondra, ny mpisehatra politika, ny mpisehatra ara-tsosialy sy ara-toekarena, ny firaisamonim-pirenena , ary ireo raiamandreny isan-tokony mba hifampihaino, hifampiresaka, ary hahay hifanome tanana ho fanavotana ny firenena. Manahy mantsy ny K3F fa izao fahasahiranana izao dia hitarika indray ho amin` ny hetsi-bahoaka sarotra fehezina ka hampiditra ny firenena anaty krizy lalina ara-tsosialy sy politika ary toekarena. Misokajy ho efatra lehibe ireo asa sy fepetra ho tanterahana dia ny ara-politika, ara-tsosialy, ny ara-toekarena ary ny fandaminana ny fitantanan-draharaham-panjakana raha ny sosokevitra ho fanarenana maika ny firenena.

Marigny A.

Tia Tanindrazana

Samia mijoro ho an'i Gasikara.