Politique

Partagé sur :
• facebook

Nitondra hafatra ho an’ny tompon’andraikitra eto amin’ny firenena sy ho an’ny olom-pirenena sy ny vahoaka ny Komitin'ny Fahamarinana sy Fandriampahalemana ary Fiadanana (K3F) manoloana izao loza mihatra

amin’ny firenena izao noho ny valan’aretina “coronavirus”. “Ekena tokoa fa sarotra ny mifehy ity fahavalo iombonan’izao tontolo izao ity ary tsy maintsy raisina ny fepetra hentitra raha toa ka te hiaro ny vahoaka tokoa isika. Andraikitry ny olom-pirenena tsy an-kanavaka araka izany ny manaja ireo fepetra ireo na dia sarotra sy mavesatra aza ny fiantraikan’izany amin’ny fiainan’ny isan-tokatrano” hoy ny K3F. Miantso ny fahendren` ny Malagasy rehetra ity komity ity amin’ny anaran’ny fihavanana Malagasy mba hifampitsinjo sy hifampihaino ary hifanampy. Manao antso avo koa ho an’ ny mpanao politika rehetra tsy an-kanavaka mba tsy hanararaotra izao zava-doza mahazo ny vahoaka izao, ka hanao entam-barotra ny fahoriam-bahoaka, na hanao sarimihetsika samihafa hikendrena tombontsoa politika. Ny fihetsika mahazatra ny mpanao politika toy izany mantsy (na ny eo amin’ny fitondrana, na ny mpanohitra) no mankaleo tanteraka ny vahoaka ka mahatonga azy ho mailo sy masiaka manoloana ny toe-draharaha manahirana iandrasambahaolana amin’ny rehetra. Mendrika hiaina ao anatin’ny Fahamarinana sy Fandriampahalemana ary Fiadanana ny malagasy koa manantena ny fandraisana andraikitry ny tsirairay sy ny fahatongavan-tsaina noho izao loza mihatra amin’ny firenena sy ny vahoaka izao. Mitaona ny vahoaka koa mba tsy ho roboka amin’ny fandrangitana mety hanimba aina sy fananana. Ampy izay ny ra latsaka sy aina hafoy ary ny faharavam-pananana mampahantra ny firenena. Ny fahantrana no fahavalo iombonantsika ambadik’izao voina izao, hoy hatrany ny K3F.

Marigny A.

Tia Tanindrazana

Samia mijoro ho an'i Gasikara.