Politique

Governemanta sy depiote Nahemotra ny “face à face”

Politique
Alarobia 30 Jona 2021

Tsy raikitra tamin’ny ora farany ny fifanatrehan’ny avy eo anivon’ny governemanta sy ny depiote izay tokony notontosaina anio teny amin’ny CCI Ivato.

Antony, raha ny fanazavan’ny filohan’ny antenimieram-pirenena, Christine Razanamahasoa, dia noho ny fisian’ny filankevitry ny minisitra efa tapaka fa tanterahana isaky ny alarobia. Rahampitso alakamisy indray, noho izany, raha toa ka tsy misy intsony ny fiovana, no fotoana ifanomezan’ny governemanta sy depiote amin’ity “face à face” manaraka ity. Heverina fa ho maro ny lahadinika tokony hifanatrehan’ny roa tonta manoloana ny fizotry ny fiainam-pirenena ankehitriny saingy ny andrasan’ny maro, indrindra, ireo mpanara-baovao aloha dia ny mikasika ny fitantanana ny tetibolam-panjakana ho an’ity taom-piasana ity. Isany mampametra-panontaniana ihany ny hoe tsy efa tokony omanina ela ve ny fisian’izany fifanatrehana eo amin’ny fahefana mpanao lalana sy mpanatanteraka izany? Zava-dehibe noho ny fifanatrehana amin’ny solombavambahoaka, izay heverina ho solontenam-bahoaka, ve ny fifanatrehan’ny samy fahefana mpanatanteraka, indrindra, ao anatin’izao toe-draharaha ilana ny filan’ny eny ifotony izao ?
J. Mirija