Governemanta Beriziky

Partagé sur :
• facebook

Tsy hiandry ela fa anio ihany aorian’ny fahavitan’ny fianianana ka hametrahana amin’ny toerany ny filoham-pirenena voalohan’ny Repoblika fahefatra, Hery Rajaonarimampianina dia ho rava ny governemantan’ny firaisam-pirenena tarihin’i Beriziky Jean Omer.

Nanamafy izany ny tenany nandritra ny fandaharana «L’Invité du Zoma» nanasan’ny mpanao gazety Onitiana Realy azy, fa dia hametra-pialana ny governemanta tarihiny anio, ka anjaran’ny filoham-pirenena vaovao no mandamina ny tohiny, na mbola hitazona azy ireo hanohy ny fampandehanan-draharaha mandra-panendry ny praiminisitra vaovao na tsia. Fanajana ny fomba fanao amin’ny tany manaja ny sata repoblikanina no antony, araka ny fazanavany, na tsy misy lalàna manery azy hametra-pialana avy hatrany aza. Nanipika mazava i Beriziky Jean Omer nandritra io fandaharana io fa tsy mieritreritra ny ho kandida praiminisitra amin’ny fitondrana vaovao eo ny tenany. Ny 28 oktobra 2011, taorian’ny fanasoniavana ny tondrozotra, i Beriziky Jean Omer no voatendry tamin’io toeran’ny praiminisitra hitarika ny governemantan’ny firaisam-pirenena io, nandimby toerana an’i Camille Vital. Praiminisitra faha-16 teo amin’ny tantaran’ny fanjakana malagasy izy. Sady praiminisitra i Beriziky Jean Omer no nisahana ny asan’ny minisitry ny tontolo iainana sy ny ala tamin’izao fiafaran’ny tetezamita izao.

Nangonin’i Jean D.

Tia Tanindrazana

Samia mijoro ho an'i Gasikara.