Politique

Filankevitra monisipaly Antananarivo Hafana ny fivoriana manomboka anio

Politique
Alarobia 26 Aogositra 2020

Hiatrika fivoriana ara-potoana ny filankevitra monisipaly manomboka anio alarobia ary haharitra hateloana izany. Lahadinika voafaritra ho dinihana mandritra izany ny fanitsiana ny tetibolan` ny CUA taona 2020.

Raha tsiahivina dia mitentina 106 miliara ariary ny tetibolan` ny kaominina izay nolanian` ny mpanolotsain` ny tanàna tamin` ny fiandohan` ny volana febroary. 50 miliara ariary ho an` ny fampandehanan-draharaha ary 56 miliara ariary izay nambara tamin`izany fa mbla ho tadiavina ho an` ny fampiasam-bola. Andrasana ihany koa ny tatitry ny asa nandritar ny fihibohana izay hataon` ny ben` ny tanàna Naina Andriantsitohaina, izay mahakasika indrindra amin` ireo tany sy fananan` ny CUA izay mbola eny am-pelatanan` ny olona efa tsy miasa intsony. Ho dinihana ihany koa ny hanomezana anaran-dalana ny anaran` ny Pastera Andriamanjato Richard sy Guy Willy Razanamasy izay efa samy ben` ny tanànan` Antananarivo avokoa. Ho laniana ihany koa ny fanitsian-drafitra eny anivon` ny sampana mpamonjy voina. Antenaina fa hafana ny fivoriana satria tsy maintsy hisy ireo mpanolotsaina no hanipy resaka momba ireo raharaha mafana toy ny Raharaha MBS sy Pavillons etsy amin` ny Esplanade Analakely.

Marigny A.