Politique

Fifidianana tany Soanierana Ivongo Nandika lalàna Rajoelina sy ny IRD, hoy Rasomotra

Politique
Alakamisy 13 Jona 2019

Nanamafy ny fisian’ny tsy fanarahan-dalàna tamin’ny fifidianana solombavambahoaka farany teo ny kandidan’ny TIM tao Soanierana Ivoko Mananjara Fidison na Rasomotra.

Nampiseho ny porofo fa tena nisy ny fitanilan’ny filoham-pirenena izay nidina ifotony tany an-toerana nanohana ankolaka ny kandidan’ny IRD ny 21 mey, tao anatin’ny fotoanan’ny propagandy. Nisy ny raharaham-pitokanana vatofehizona fotodrafitrasa ambara fa hatao. Ny kandida mpisolo toerana na ny “suppléant” Atoa Lemena Jeanné Afrique, dia nanao samboady amin’ny maha ben’ny tanàna nandritra io fotoana io, izay nisian’ny fandraisam-pitenenan’ny filoha. Mbola ben’ny tanàna ihany, kanefa efa tokony hitsahatra. Misy ny horonam-peo mazava notehirizin-dRasomotra sy ny ekipany tamin’ny kabarin-dRajoelina nivoy fa hanongana azy ny kandida mpanohitra raha maro an’isa, ka fantatry ny vahoaka ny tokony hatao sy hofidiana sy afaka hiara-kiasa amin’ny filoha. Nisy fiantraikany tamin’ny voka-pifidianana io fihetsiky ny filoha io, raha ny nambaran’ity kandidan’ny TIM ity izay namotsipotsitra ny fandikan-dalàna tsy tokony havela amin’izao fotsiny.

Toky R