Politique

Partagé sur :
• facebook

Manana olona tena mahavita azy ve ny antoko sy vondron’antokon’ny fitondrana? Ho avy indray mantsy ny mety ho fikitihana na fanovana governemanta.

 Minisitry ny harena an-kibon’ny tany enim-bolana vao voatendry, olona hatao Ambasadaoro aty amin’ny 3 sy 4 taona nitondrana vao manangona “CV”,.... Toerana politika ny toeran’ny minisitra, saingy mila traikefa ara-pahalalana sy ara-teknika ihany koa. Ekena fa maro ny mirangorango toerana sy seza, indrindra fa ny mpanao politika, saingy betsaka no tombotsoa no maha maika azy. Sarotra ho an’ireo manam-pahaizana sy manana traikefa manana etika, ary olona heverina fa mbola madio anefa no hidi-kizo ao anatin’izao fitondrana izao. Fanamby lehibe izany mandray toerana minisitra izany, saingy sarotra ny hanao fahagagana ao anatin’ny lavaka mangitsokitsoky ny tsy fahaiza-mitantana kanefa ny fotoana efa fohy dia fohy sisa hananana, tsy afaka hanao mazia ao anatin’ny lavaka lalina. Noho izany, tsy te hanimba tena ao anatin’io Fanjakana io ny ankamaroan’ny manam-pahaizana. Tsy hoe: tsy mahay ireo minisitra ankehitriny, ireo mpitantana,… fa ny politikam-panjakana sy politikam-pitantanana nentin’izao Fitondrana izao mihitsy no tsy mahomby sy tsy marin-toerana. Vina misavoamboana, diplaomasia manidintsidina,… ankoatra ny efa tsy fahamarinan-toerana tany amin’ny fifidianana. Raha tena nanana olona izao Fitondrana izao tsy nitaredretra tahaka an’io. Ny tonta ihany ve no havadibadika? Sarotra ho an’ny Filoha noho izany ny zava-misy satria ny fanilihana ireo ekipa izay maro no be afera sy manaratsy endrika ilay fitondrana, misy ny tsy mamokatra,… dia mety hampitombo ny mpifandrina ara-politika. Toa endriky ny ho faharendrehan’ny Fanjakana Rajoelina ny zava-misy sy miseho rehetra.

Toky R

Tia Tanindrazana

Samia mijoro ho an'i Gasikara.