Politique

Partagé sur :
• facebook

Niaiky Atoa Pierrot Rajaonarivelo fa izy mihitsy no nanala tena tao anatin’ny antoko Arema ary nanolotra ny fitantanana tamin’ny Amiraly.

Marina koa, hoy izy fa ao anatin’ny karazana fahasahiranan-tsaina ireo mpikambana ao amin’ity antoko ity amin’izao fotoana noho ny tsy fisiana mpitarika mazava. Nambarany ihany koa fa tsy mora ny toe-draharaha amin’izao fotoana ka mialoha ny fanapahan-kevitra rehetra horaisina dia tsy maintsy misy aloha ny fihaonany amin’ireo mpitantana ny antoko Arema amin’izao fotoana. Efa nanipy teny ihany anefa izy fa tsy antoko fa vovonana ny Mientana ho an’ny Demokrasia eto Madagasikara na MDM, ary antoko sy fikambanana politika 100 mahery no efa mivondrona ao, koa tsy olana mihitsy raha toa ka miditra ao ny Arema.

Raha araka ny fandinihan’ny maro azy dia mety ity safidy faharoa ity no metimety kokoa satria ho sarotra ihany ny hoe hiverina hitantana ny Arema sady ho filoha mpitarika ny MDM Atoa Pierrot Rajaonarivelo. Etsy ankilan’izay dia azo antoka fa tsy hanaiky hosongonan’i Tonton Sôla mihitsy ny Amiraly Ratsiraka raha mbola velona sy mahatsiaro saina tsara, ary na misy aza ny famindram-pitantanana ataony momba ny antoko noforoniny dia olon-kafa no omeny izany fa tsy ity mpiara-miasa aminy fahiny izay efa namadika azy ity. Andrasana amin’ity herinandro ity ny fihaonana eo amin’ny filohan’ny MDM sy ireo komity mpiara-mitanana ny Arema ahitana ny loholona teo aloha Vaovao Benjamin sy Atoa Ralaidovy Samuel sy ny maro hafa. 

Tia Tanindrazana

Samia mijoro ho an'i Gasikara.